斯洛伐克U21生死大反擊
2012/10/15文:法達斯維
盧克迪莊係荷蘭前線殺着。
 
 

今輪國際賽日，除了一眾大國腳為出戰世盃打甩髀，小國腳亦要為明年舉行的U21歐國盃決賽周席位鬥得激烈。今晚附加賽獨腳戲，荷蘭U21手握兩球優勢，返主場再鬥放手一搏的斯洛伐克U21，預計會合演一場入球騷，大盤捧得過。

今場係U21歐國盃第二階段附加賽次回合，兩回合計勝出者，將會殺入明年的決賽周。荷蘭青訓一向出晒名，該隊近年都表現出色，曾於06同07年連奪兩屆U21歐國盃冠軍，今屆當然唔想失威，不但於分組賽6勝1和1負首名晉級，剛又於附加賽首回合作客輕取斯洛伐克兩蛋，其中効力荷甲前列分子維迪斯的中場雲堅基爾，個人包辦兩粒，腳風順到不得了。

荷蘭炮火猛領先照攻
除雲堅基爾有料到外，「橙軍」亦坐擁於分組賽轟入8球的射手施富克，仲有今夏入選歐國盃大國腳的慕遜加柏高大中鋒盧克迪莊坐鎮，支支大炮都火力驚人，來到U21賽事可謂超晒班，加上有兩球在手咁好踢，再贏一場唔難。當然，作客的斯洛伐克U21亦唔會坐以待斃，一眾外流中前場如羅拔馬克、拉斯基同菲臘基斯應會正選披甲，誓與對手大駁火，呢場好有機會大手交易，大盤有買趁早。