紅魔平手唔怕
曼聯首循環喺奧脫福爆冷不敵熱刺，近廿七次交手首次輸波，激到費格遜紮紮跳，今晚拉大隊作客熱刺決心復仇，大軍仲有個硬淨戰績支持，紅魔喺英超成立後從未試過被熱刺「雙殺」，莊家開緊平手盤，必捧曼聯！

睇番曼聯今季九月尾主場2比3不敵熱刺過程，當日紅魔防線中路缺少大將尼曼查維迪，老將里奧費迪南畀對手快翼加里夫巴利放乾出盡洋相，當時曼聯急於平反敗局，防線谷得太前，輸反擊輸到慌，家陣維迪回歸，曼聯後防硬淨好多。

熱刺主場遇強現形
現時曼聯主要傷兵包括中堅莊尼伊雲斯及快翼艾舒利楊格，中場費查做手術提早收咧，大軍兵源充裕，少幾個人用影響唔大。老費近期中場慣用香川真司同湯卡華利等跑得之人，逼搶效率高，作客都可同對手搶中場，仲有黃金鋒線組合朗尼及尹佩斯拍住上，進攻火力勁，今戰定必有仇報仇，結合埋球會喺英超史上從未兩循環輸晒畀熱刺嘅靚績，令人信心更大。

熱刺近八次主場出擊七勝一和，當中最勁嗰隊只係利物浦，其餘對手級數一般，佢哋今季主場輸過畀車路士，對住水準穩定嘅曼聯更難贏。熱刺最勁嗰個始終都係加里夫巴利，曼聯首循環畀佢玩到謝，今仗肯定會特別搵專人睇實呢位球星，若果熱刺前線淨係用迪科爾攻堅，威脅力有限。