皇蘇平手盤奪愛
今季西甲巴塞隆拿一枝獨秀，的確冇咁精彩，亮點反而係「神奇球隊」皇家蘇斯達，佢哋唔經唔覺保持十場聯賽不敗，包括擊敗巴塞，實在唔嘢小。皇蘇愈踢愈心雄，目標直指下屆歐聯參賽資格，今晚作客對住已放軟手腳嘅愛斯賓奴，更加未驚過，平手盤力捧皇家蘇斯達。

一講起西甲，只會諗巴塞皇馬，相信季前冇人會估到皇家蘇斯達可以打入前四。正因為佢哋唔起眼，甚至被輕視，冇咁易招惹對手狙擊，成功殺出一條康莊大道，近十八場聯賽僅輸過畀皇馬，期間贏過馬拉加、華倫西亞、巴塞隆拿及馬德里體育會等勁旅，充滿說服力。

皇蘇最煞食地方係踢法機動、高效率，兩位翼鋒基沙文同干沙路卡斯度速度快、突破能力強，令普遍行軍較慢嘅西甲球隊防不勝防。配合射手卡路士韋拿及中場隊長皮亞圖攻門，已有一套行之有效戰術，將整體戰威力發揮得淋漓盡致。加上歐聯入場券在望，對呢班寂寂無聞嘅球員來講，更係爭取名成利就嘅黃金機會，幾大都搏埋佢。

愛奴搶夠分鬆懈
愛斯賓奴經過早前瘋狂搶分後升上中游，護級壓力大減下表現亦有所鬆懈，近四場僅一勝，其中三仗仲冇波入，狀態、戰意及實力都較遜色下，想贏如日方中嘅皇蘇，談何容易。平手盤買皇家蘇斯達，可以話係坐和望贏。