今晚洲際國家盃B組尾輪，由尼日利亞硬撼世界1哥西班牙，前者星味欠奉，只靠車仔中場約翰米基爾帶住一班新仔吸取經驗，「狂牛」雖然手握6分，但佢哋今屆一改慢熱作風變身急先鋒，經常迅速打開紀錄，預計會快刀斬亂麻解決尼軍，「半場客勝」分頭唔錯值博。

（無綫翡翠台及高清翡翠台周一凌晨3時直播）

自從尼日利亞由前國腳基舒出任主帥後，佢刻意改變球隊華而不實嘅踢法，因此棄用一些大牌球星，例如奧丹維治、馬田斯等，並且圍繞約翰米基爾做核心，由佢帶住一班唔出名嘅新仔，打造一支務實、團結及以整體戰為主嘅「超霸鷹」。不過針無兩頭利，冇咗一班技術出眾的球星，加上打法變得更注重防守，令球隊變成守強攻弱，由於同組嘅烏拉圭今輪贏大溪地冇難度，尼軍若想出線，今仗不但非勝不可，而且至少要淨勝4球，然而尼軍不擅主攻，隨時畀西班牙玩番轉頭。

西班牙今屆棄用無鋒陣，主帥迪保斯基希望考察一眾前鋒嘅狀態，而韋拿、費蘭度托利斯、蘇爾達杜亦不負所託輪流發威，費托上仗對大溪地更食出大四喜，不過迪帥只會派出單箭頭，邊個打正選都未知，因此一有機會披甲仍要爭取表現，唔使驚佢哋唔搏。自從復用中鋒後，中場如沙維、恩尼斯達有個明確嘅畀波目標，令「狂牛」攻勢嚟得更直接，尤其喺開波初段，經常趁對方陣腳未穩加快節奏，企圖盡早打破僵局，從近4場有3仗半場領先可見一斑。

由於尼日利亞要焗攻爭勝，防線被迫移前將暴露更多空位，隨時畀「狂牛」有機可乘，入多幾粒早早鎖定勝局，到下半場又玩控球在腳等收工，因此「半場客勝」有1.65倍非常值博。