雲集八支勁旅角逐嘅重量級熱身賽「國際冠軍盃」周日凌晨展開，意甲AC米蘭作客靠羅賓奴及尼祖迪莊各建一功，作客2比1擊敗西甲華倫西亞，不過入波功臣羅賓奴於比賽中傷出，預計需要養傷一至兩周，另一殺手巴洛迪利則有機會在周中熱身賽復出。

　　「國際冠軍盃」屬今夏熱身賽重頭戲之一，參賽球隊有英超車路士、愛華頓，意甲祖雲達斯、AC米蘭、國際米蘭，西甲皇家馬德里、華倫西亞及東道主美職洛杉磯銀河，除華倫對AC一役，其餘賽事全部在美國舉行。

　　巴神下仗倒戈曼城

　　AC米蘭贏波後，下一場對手係車路士對國際米蘭嘅勝方，不過踢呢場比賽前，AC周中先會前往德國參加拜仁舉辦嘅奧迪盃，AC首場對手係啱啱喺香港贏得巴克萊亞洲锦標賽嘅曼城。據報養傷多時嘅巴洛迪利會喺今場復出，最近佢被傳媒影到喺希臘度假時煙不離手，神態輕鬆，睇嚟對復出胸有成竹。