荷甲開鑼戰喜逢私房菜

　　新一季荷甲周六凌晨揭幕，打頭陣由衞冕冠軍阿積士主場鬥洛達。阿積士上周喺落後兩球劣勢下反勝阿爾克馬爾捧走荷蘭超級盃，狀態火速入局。洛達近年作客阿積士輸多贏少，阿積士讓二球照捧「讓球主勝」。

　　(now 670周六凌晨2時直播)

　　阿積士今季目標係挑戰聯賽四連霸，陣容方面，雖然基斯甸艾歷臣盛傳受利物浦青睞，但現階段轉會仲未成事，該名丹麥國腳仍可替阿積士上陣，上周荷超盃反勝阿爾克馬爾嘅三個入球，當中有兩個都關佢事，證明佢嘅狀態已經七七八八，對於要求三分嘅主隊嚟講自然係好消息。

　　借到保贊火力更勁

　　阿積士上季由西甲勁旅巴塞借用小將艾錫古恩卡，今季食過翻尋味再借用保贊，保贊無論喺資歷、經驗方面，都比艾錫古恩卡有過之而無不及，配合原有史基賀臣、施安迪莊等好手，進攻火力依然有保證。

　　洛達今季有前鋒馬爾基、後衞維拿特離隊，佢哋季前熱身賽成績唔錯，不過對手大部分都係二流球隊，而且熱身賽始終係熱身賽，參考價值不大。洛達對上六次作客阿積士只得一和五負，其中對上三次輸波都淨輸三球或以上，就算今場讓球主客和阿積士讓二球，「讓球主勝」依然係首選。