改革需要時間，法國今晚喺熱身賽主場對烏拉圭，新教頭迪甘斯唔似可以即時完成「法國大革命」，因為受到歐國盃內訌事件影響，今次有4個搞事球員冇入選，再加上傷兵問題，感覺似用二隊出戰，烏拉圭至少有王牌科蘭孭飛，受讓有權開出1.75倍「讓球客勝」。

南非世盃內訌罷踢後，原本以為白蘭斯搞得掂法國班麻煩友，點知去到歐國盃，結果又係內亂自毀，除咗拿斯尼同文尼斯被法國足總內部停賽，新教頭迪甘斯連有份搞事嘅賓艾化同馬維拿都唔選，即係話有4件中場唔踢得，另外，前鋒雷米同中場卡巴耶養傷，今場法國似街場鬥波湊夠腳算數。

再講，4大聯賽即將開鑼，迪甘斯有冇本事嗌皇馬射手賓施馬同拜仁翼鋒列貝利為佢賣命，絕對令人懷疑，要知道賓施馬同列貝利都係性格巨星，呢場拖住班二打六出戰，唔似肯冒住受傷危機搏盡。大家知啦，烏拉圭踢法出名夠辣，今次中後場陣容相當完整，要頂住法國疲弱炮火絕對唔難。

雖然兩大射手蘇亞雷斯同卡雲尼，分別為烏拉圭男奧足出戰倫奧足球賽後休息冇入選，但正因為咁，施巴斯坦費南迪斯同艾比奧至有機會擔大旗顯身價。更何況，科蘭重返南美後喺巴甲生猛番，要佢長期保持頂級狀態或者難啲，但以佢卡士，要射爆冇料扮四條嘅法國絕對唔難，吼實「讓球客勝」有着數。