倫奧告別，英超未開，不過今晚仲有好波睇，就係由老牌勁旅德國喺法蘭克福主場硬撼阿根廷嘅超重量級大戰。日耳曼兵團今仗有正選門將紐亞缺陣；客隊亦有甩漏王中堅高洛仙尼重出江湖，大家都不設防，自然益晒超級殺手高路斯同美斯開餐，梗係博1.8倍入球大啦！

德國喺歐國盃4強遇剋星意大利出局，令球迷相當失望，不過領隊勒夫已經將目標直指2014巴西世界盃，今次點兵嘅19人名單中，就包括施雲賓達同達斯拿兩個之前喺最後階段落選歐國盃名單嘅新星。雖然話大軍名單仲係星光熠熠，但查實佢哋今仗有隊長拿姆因老婆生仔缺陣，「小豬」舒韋恩史迪加與射手馬里奧高美斯養傷，普多斯基同梅迪薩卡亦要隨阿仙奴準備英超開咧缺陣。陣容不整，就算前面可以憑質素入波，後面就點都信唔過。

更令力奇擔心嘅，係正選門將紐亞踢完德超盃宣布因傷退隊後，根本冇個龍門信得過。由於領隊勒夫之前已經放棄咗經驗替補韋爾斯，結果喺揀入漢諾威23歲門將薛拿之外，惟有再補選埋慕遜加柏20歲新星達史特根入伍。要知道薛拿歷來唯一一次代表德國上陣對烏克蘭，就創出17分鐘失3球嘅「經典」紀錄。至於達史特根歐國盃前熱身賽處子戰對瑞士仲輸夠5球添！

另邊廂嘅阿根廷，領隊沙貝拉今次點兵嘅21人大軍中，除咗包括美斯、阿古路同希古恩等，另一個焦點則係重召闊別國家隊3年嘅紐卡素中堅高洛仙尼。咪話力奇潑佢冷水，呢個獅子頭中堅技術其實麻麻，仲好鍾意踢高章波，擺佢落場就同孭個炸彈喺身冇分別。又係攻強守弱陣容，以兩班波都係連續4場開出入球大去睇，今鋪梗係博「大」等睇入球騷啦！

‧對上7場主場得6勝1負。

‧連續4場開出入球大。

‧近5次交手得1勝3和1負。

德國教頭勒夫係奇連士文繼承者，最鍾意玩進攻足球，對家阿根廷有新球王美斯孭飛，入波當然唔會少，而且兩隊後防其實都好鬆散，既然德國喺南非世盃試過以4:0血洗阿根廷，呢場復仇之戰，相信阿根廷會的起心肝踢爭氣波，特別係美斯近期已洗脫國際賽腳軟污名，根本冇人擋得住佢，以小博大試吓2:2同3:3波膽，隨時有意想不到嘅收穫。