[太阳报]烏甸晒冷強攻布拉加

太阳报

2012-08-28

意甲球隊烏甸尼斯上屆歐聯附加賽出局入唔到分組賽，教練古杜連為圓歐聯夢想，上場意甲收起大部分正選留力，決心非常明顯！今晚養精蓄銳下，主場硬撼葡超新貴布拉加，我撐1.85倍主勝。

烏甸尼斯近年喺意甲異軍突起，站穩陣腳後目標當然直指歐聯，喺附加賽首回合作客葡萄牙踢成1:1，有一個作客入球喺手形勢略佔上風，今場對住唔攻唔得嘅布拉加，最擅長嘅反擊戰術肯定可以大派用場。

布拉加教頭再遇剋星

再者，教練古杜連喺上場聯賽就專登收起咗迪拿達利、杜辛巴斯達同杜米斯等8個主力，真係司馬昭之心路人皆知，雖然烏甸尼斯最終輸畀費倫天拿，但球隊只專注今場爭入歐聯分組賽嘅決心，絕對唔講得笑，今晚主場出擊絕對有力夢想成真。

另邊廂嘅布拉加亦係一支實力唔錯嘅球隊，但佢哋嘅踢法正正同烏甸尼斯一樣，都係擅長快速反擊，可惜上場佢哋失咗個作客入球，冇咗先求死守再伺機反擊嘅本錢，形勢盡喺烏甸尼斯掌握之中。唔講唔知，布拉加教練比斯路當年畀士砵亭炒魷，就係因為歐聯外圍賽畀烏甸踢出局，今晚再遇剋星，睇怕都係「噩夢重演」。

首回合：烏客和1:1