巴塞突襲艦隊
2012/08/29文:力奇
「沉淪艦隊」皇馬今晚喺西超盃次回合主場鬥巴塞，雖然會有「殺手防中」比比復出，仲話有「新發電機」莫迪歷隨時候命，不過考慮到佢哋近況低沉，家陣落後2:3仲要焗攻，以美斯為首嘅巴塞閃電戰隊大把機會搵食，足智彩開平手盤，一於捧1.9倍巴塞勝。

首回合巴塞雖然只係小勝1球，但論全場形勢，「地上最強」明顯係大佔上風嘅一方，再者，若非巴塞門神域陀華迪斯送禮，皇馬又點會追得番2:3，等今場仲有價講吖！不過咪話力奇潑「銀河艦隊」冷水，喺C朗仲未上力嘅情況下，奧斯爾又長期態沉，莫迪歷新加盟未夾熟班波，佢哋又邊有能力去反勝先？

比比腦震盪後首度登場
防線方面，比比復出雖然為皇馬喺中場加番道屏障，但佢腦震盪後首次落場，隨時患得患失，狀態同信心有幾多真係難講。左閘法比奧干查奧上場聯賽衰多口被逐，仲要睇吓球庭點判，隨時今日賽前先收通知要停賽，打亂晒部署，今晚仲要焗攻，點搞呀？