巴塞華倫對攻開大騷
2012/09/02文:張健峰
終於開始喇！日之泉JC晨曦今日展開新季第一擊，下晝5:00會喺旺角場主場迎戰傑志，兩支香港亞協盃代表球隊對碰，戰況肯定相當激烈，各位球迷記住入場支持「張峰」、支持兩支球隊、支持本地波喇！

講到大戰，今晚西甲都有場巴塞隆拿喺魯營惡鬥華倫西亞，兩軍暫時都畀人入得又失得嘅感覺，呢場最啱梗係捧3.5球中位數嘅1.9倍入球大啦！

華倫冇加高防守力大減
巴塞喺西超盃因作客入球不及皇馬失落冠軍，輸咗個盃事小，輸面事大，班巴塞球星家陣谷埋一肚火，今晚仲唔喺自己地頭盡情入波發洩咩！不過講真，巴塞喺西超盃兩回合都未能保持清白之身，碧基同門將域陀華迪斯頻頻出現低級失誤，相當靠唔住。不過講到鋒力，巴塞真係勁到冇朋友，上場對皇馬踢少個都仲Keep到有攻勢，上輪西甲作客奧沙辛拿，一㩒掣就靠美斯連入兩球反勝，真係唔講得笑！

上星期「張峰」都同大家傾過華倫嘅入球能力，蘇爾達杜為首嘅鋒線確實火力十足， 可惜華倫上場對拉科早早攻入3球，但勢估唔到新加盟嘅加高傷出，原來對隊波嘅攻守有咁大影響，畀對手追下一球追下又一球，最終3:3失分收場。

有消息話加高今晚仲未踢得，冇咗佢，想頂得住巴塞進襲根本難過登天，若然能夠隊番「地上最強」一兩粒已算有交代，咁嘅環境，梗係博入球大啦！