後備爭上位打殘巴拉圭 撐阿根廷
2012/09/07文:安高

喺熱身賽連贏巴西、德國兼累積5連勝嘅阿根廷， 朝喺世界盃南美洲區外圍賽主場迎戰巴拉圭，喺美斯帶領下要贏波「依絲執」啦！最緊要係佢哋一班副選前鋒都要爭演入球騷，對住啱啱換新帥立立亂嘅巴拉圭，應該唔難大捷，安高捧1.87倍「讓球主勝」。

目前喺南美洲區5戰得10分排第3嘅阿根廷，為確保出線，今鋪喺科爾多瓦主場出擊點會留手？雖則話佢哋今仗會有前鋒阿古路同中場馬斯真蘭奴停賽，但球隊實在人才濟濟，就算防線有高洛仙尼因傷退隊，都一樣冇有怕。

巴拉圭換新帥唔識死
再者，主帥沙貝拉今次點兵，前線除咗有美斯同希古恩孭飛外，就連坐波監嘅阿古路都有份。沙貝拉解釋話阿古路係用嚟下周鬥秘魯，換句話講今仗同樣有份入選嘅新兵箭頭巴科斯同國米射手柏拉斯奧都要好好把握今仗機會「騷哥利」，同阿古路爭下場正選，今鋪自然入少球都唔肯啦！

巴拉圭呢邊，啱啱搵嚟新帥比路素領軍，呢個烏拉圭人過往從未帶過國家隊，經驗係一大問題。佢賽前仲要懶勁話要畀阿根廷驚喜，同人哋玩對攻喎。冇錯，佢哋都有辛達告魯斯同奧斯卡卡度素等一級射手，但拍埋阿根廷都始終差一截，再加上今場係作客波，鬥攻咪盞輸大大鑊！