法國省招牌 新帥迪甘斯肅清紀律
2012/09/07文:力奇
喺新帥迪甘斯手下重新出發嘅法國國家隊，今晚喺世界盃歐洲區外圍賽I組首戰作客芬蘭，憑較佳質素同爭吐冤屈氣嘅決心，要贏波唔難，1.55倍客W穩陣。

連續兩個國際大賽爆內訌醜聞嘅「高盧雄雞」，歐國盃後搵嚟前國家隊隊長名帥迪甘斯接掌，勝在威望十足，應該唔難肅清紀律。佢今次點兵雖然續有麻煩友拿斯尼內部停賽，賓艾化同馬維拿因為唔同理由落選，但天才中場文尼斯則喺坐完一場內部波監後，獲得重召。迪甘斯話明要佢自律同交貨，點到佢唔搏先？

芬蘭踢進攻足球衰多兩錢重
大軍同時重召阿仙奴中場戴亞比，可以為防線添置一道屏障，雖然後防中路嘅阿爾拉米同哥斯尼狀態未足，但憑經驗，要應付芬蘭嘅疲弱鋒力應該綽綽有餘。事實上，迪甘斯上月已經喺熱身賽領兵出戰烏拉圭被悶和0:0收場，今仗當然想贏波省招牌啦！

芬蘭由麥素柏達拿倫領軍，呢位前斯特拉斯堡前鋒賽前話今晚會踢進攻足球搶分，如果係真嘅話，後防只會暴露更多空位，更加牙煙。佢哋大軍只得兩名土炮，但一眾外流兵團最出名只係効力魯賓卡山嘅艾利文高兄弟兵，同前雲達不來梅中堅柏辛倫等，整體實力有限，主場都信唔過。