三獅兵 爛地照降「摩」
2012/09/07文:亨格比利
世界盃歐洲區外圍賽今晚揭開戰幔，H組焦點英格蘭造訪摩爾多瓦，展開進軍2014年巴西世盃第一擊。「三獅兵團」飽受傷兵問題困擾，賽前又有報道話摩爾多瓦個「英甲爛場」係幾咁惡踢，不過迪科爾同巴尼斯等二線兵難得擔正，笪地再爛都要搏老命取悅主帥鶴臣啦，「讓球客勝」有1.85倍值得支持喎！

對上一次英格蘭造訪摩爾多瓦要追溯到1996年，嗰場波係荷杜首度領軍加埋碧咸嘅國家隊處子戰，結果佢哋憑班比、加斯居尼同舒利亞各入一粒贏3:0，16年後嘅今日，亨格比利相信賽果唔會有太大出入。畢竟摩爾多瓦喺歐洲只屬四流貨色，大軍球員冇一位喺歐洲主流聯賽搵食，今年踢4場國際賽更連1球都入唔到，咁嘅料點同英格蘭鍊呀？

怕咗「英甲草」到埗即踩場
呢場H組分組賽喺基希訥烏嘅森布魯球場舉行，全場10,500張波飛開售6個鐘已經賣晒，值得一提係呢個場嘅草地質素麻麻哋，威爾斯球隊賓高城今年7月去過踢歐霸盃，球會秘書長話草地質素同英甲啲爛地場差唔多喎！所以英格蘭都驚出事，足總晨早就派咗代表去森布魯球場視察過兩次，《衞報》仲話英格蘭大軍喺當地時間周四到埗後，已經急急腳落場踩吓草，有備而來夠晒認真，淨係呢點都抵撐啦！

朗尼 卡路爾打柴 迪科爾孭飛
話就話英格蘭傷兵滿營，朗尼因傷落選，安祖卡路爾、艾殊利高爾同阿當莊臣亦都打咗柴，但骨幹好似赫特、泰利、林柏特同謝拉特等都悉數在陣，消息指A高喺下周三凌晨有望復出鬥烏克蘭，頂佢個位嘅巴尼斯同難得擔正嘅前鋒迪科爾，今晚仲唔出盡渾身解數咩！

雙方實力有一段距離就梗㗎嘞，但「三獅兵團」主帥鶴臣賽前就話唔敢輕敵，指摩爾多瓦曾經喺上年10月嘅歐國盃外圍賽僅負荷蘭0:1，已經落咗「柯打」叫班手足打醒十二分精神，睇嚟摩爾多瓦想偷雞都難！

英格蘭7戰不敗
‧過往兩軍只曾對賽2次，均由英格蘭勝出。

‧摩爾多瓦近4場國際賽不勝。

‧英格蘭近7場國際賽不敗。

質素贏晒博埋「客客」
雖然英格蘭入球能力唔算好高，今晚又缺少王牌朗尼同柱躉中鋒安祖卡路爾，想大踢英式足球都唔得，但前線依然有迪科爾、韋碧克同史杜列治3技術型箭頭，火力有番咁上下，即使今晚唔能夠夫添上陣，但講質素依然遠勝主隊，要一早入波領先唔係難事，今晚不妨買埋1.77倍嘅「客客」。