龜縮舊生守「細」波鍊河床
2012/09/09文:九叔

今日河床對紐維爾舊生場阿甲，可能啲賽前消息仲精彩過場波，事關河床主場仲未開齋，舊生就龜縮政策使得，開季5戰一球未失，呢啲咁嘅悶波開個1.45倍入球細有乜出奇？

河床升番上阿甲之後，除咗揭幕戰主場1:2衰咗畀貝格拉諾，跟住4場波不敗，但係細心啲睇吓，佢哋開咧至今兩次主場都贏唔到波，仲只入過一球，唔係咁畀到人信心。

河床新兵「交咗稅」登場
不過，今場波賽前唔少人對呢支外號「百萬富翁」嘅球隊寄予厚望，因為佢哋件後防新兵波天尼利終於可以落場喇。其實佢原本上場對高隆就準備披甲，點知畀人查出欠落稅款未清，結果被禁出賽，好彩前日佢終於找咗數，今日可以同另一件中場新兵艾里奧羅渣士拍住上，搞到河床主帥艾美達鬼咁開心，呢兩日練波出齊查斯古特，富尼斯摩利、摩拿3個箭頭，擺明想今日响主場開胡。

問題係你咁諗啫，舊生肯放軟手腳任你砌咩？無疑羅薩里奧地區呢兩日暴雨連場，害到舊生隊冇法子好好練波，中後場仲要有馬高卡沙利斯、麥斯洛迪古斯養傷同打太公波，但係開季5戰未輸過嘅舊生，踢咗450分鐘一球不失，就知佢哋條防線有幾堅，今場作客兼賽前備戰不順，佢哋仲唔疊埋心水死守咩？入球細應該冇得走雞喇。