銀河上盤唔揸「流」
2012/09/14文:力奇

當路雲傷愈 羅比回歸
洛杉磯銀河 朝喺主場迎戰科羅拉多急流，大有獅子搏兔之勢。銀河今仗會有隊長當路雲傷愈復出，射手羅比堅尼回歸，以及新兵韋希姆臣首演，強陣出擊兼要爭取較佳季後賽種子排名，對住急流唔難大勝一場，銀河讓半一捧上盤！

銀河今季戰績雖然未算突出，但近期狀態明顯有改善，近5戰取得4勝1和佳績，主場出擊自然勝望更濃。更好消息係，因為大腿傷抖咗成個月嘅前鋒當路雲，周初已經喺預備組賽事復出，踢咗唔夠30分鐘就有1個入球兼1次助攻，狀態回升，有佢哋喺前線孭飛絕對係入球保證。

急流Hea踢等收工
此外，啱啱踢完國際賽嘅羅比堅尼，最終較預期提早歸隊，喺周二已經復操，加上瑞典國腳韋希姆臣預計都可趕及上陣，家陣唯一隱憂只有碧咸因足踝傷冇操兩日，不過消息指都係煙幕居多，「萬人迷」臨場披甲機會極高。目前排喺西岸第4嘅銀河，仲要為爭取較高排名而戰，反觀家陣排西7嘅急流，距離躋身季後賽西岸第5位嘅溫哥華白帽都有8分距離，常規賽只餘6輪追上機會唔高，睇怕都係Hea踢等炒格局。