高矮組合鬥一番 雙城戰撐奧雲
2012/09/15文:亨格比利
呢個Moment，史篤城要爆啦！踢法高Q大棍嘅史篤城，最近連環簽入奧雲同查理阿當，轉個新形象同列強抗衡，佢哋今晚喺主場同曼城合演《雙城記》，奧雲拍高治硬撼泰維斯搭迪斯高嘅高矮配鋒線，真係夠晒睇頭！查實曼城開咧至今冇厘霸氣，下周中仲要鬥皇馬，主場不嬲硬淨嘅史篤城有條件爆冷，「讓主」有2.18倍抵博。

最近史篤城成為球迷嘅Talking Point，皆因佢哋除咗簽入梅里斯伊度、尼桑斯同查理阿當3位技術型中場，仲搵埋「舊金童」奧雲返嚟，重新打造高治拍奧雲呢對英格蘭經典高矮鋒線，勁有噱頭！現年32歲嘅「Owen仔」雖然久疏戰陣，但佢前日自稱狀態唔錯，領隊佩尼斯亦講明會為奧雲制定一套新嘅戰術，面對新季3戰場場有失波嘅曼城防線，要搵食唔難吖。

史篤城主場未輸過畀曼城
睇番資料，原來史篤城自08至09球季升上英超後，4次喺不列坦尼亞球場鬥曼城都未輸過，佢哋上季英超主場亦只係輸過4場咁大把，表現硬淨，使乜赦曼城？況且曼城喺開鑼戰險勝新升班嘅修咸頓3:2，上仗鬥昆士柏更加要到臨完場先開到個「讓主」，表現毫無說服力！

阿古路復操留力鬥皇馬
係，幾位曼城生力軍好似後衞馬爾干、拿斯達錫、中場查維加西亞同翼鋒史葛冼佳亞都有機會處子登場，阿根廷前鋒阿古路又話復操，不過班新兵未夾熟，而且阿古路同隻眼啱啱好番嘅意大利「腦殘」巴洛迪利，都9成會喺下周中歐聯作客皇馬先落場，文仙尼今鋪大條道理收起主力，何況佢哋件左閘高拉洛夫，日前仲猛咁公開認叻，話自己已經有條絕世好橋嘜實皇馬萬人迷C朗，擺明個心已經飛咗去歐聯戰場，輕視史篤城隨時踩蕉皮！

藍月亮踩「史」有前科
‧史篤城近4次主場鬥曼城都係1:1收場。

‧計埋聯賽盃在內，史篤城新季4戰全和。

‧曼城新季3場英超場場有失波。