法蘭克福信心十足
2012/09/16文:自由恒

德甲每季都有奇兵突圍，前季有緬恩斯，上季就係慕遜加柏，今季相信會輪到兩戰全勝嘅升班球隊法蘭克福，今晚佢哋喺主場迎戰兩戰皆北嘅漢堡，1.75倍主W偏熱都要捧場。

雲達華治回巢漢堡幫唔到幾多
法蘭克福雖然今季先至重返德甲，人腳亦唔見得特別出眾，但勝在氣勢夠勁，於季前熱身賽取得8戰7勝先聲奪人，到開季之後亦先後殺退利華古遜同埋賀芬咸，表現僅次於暫列榜首嘅拜仁慕尼黑，相反對手漢堡雖然傾家蕩產回購荷蘭中場雲達華治，隊中亦不乏星級球員，但計埋德國盃竟然3戰皆北，聯賽兩戰更全食白果，完全唔值得博開齋。

賀芬咸散晒難敵弗賴堡
今季沉淪嘅除咗漢堡仲有賀芬咸，佢哋繼續縮皮經營，放走咗巴夫希特同埋賴恩巴布兩名荷蘭幫，結果潰不成軍，計埋德盃3戰都係慘敗，今戰更有中場指揮官沙利荷域及守將舒洛克停賽，就算個老細霍普拍晒心口話唔會炒教練巴布，以求穩定軍心，睇怕都仲有排衰，今晚德甲出戰弗賴堡，受讓平半都要唔過。