雷丁唔驚刺貨
2012/09/16文:阿占

熱刺「降呢」，新兵冇料到
開季前唔少球迷話熱刺今個暑假簽咗咁多個好波之人，應該有啲睇頭，不過阿占就認為領隊保亞斯喺轉會市場嘅表現只係僅僅合格，牌面上甚至唔及上季。結果佢哋開季3場不勝，近日仲有新加盟門將洛里斯引爆內亂，今晚作客新升班嘅雷丁未必可以反彈贏波，仲要讓波阿占撐硬雷丁1.8倍「讓球主勝」！

洛里斯詐型爆內訌
熱刺今季簽入迪比利、丹普西、基菲爾施古臣、維頓漢同洛里斯，睇落真係好有氣勢，不過只要細心睇真啲，其實佢哋係「頂檔」多過加強，佢哋只係頂番莫迪歷、雲達華治同京治離隊嘅空缺，論級數甚至係「降呢」添！原本搵法國國腳洛里斯接替41歲嘅費度都係明智，不過保亞斯講明費度仍然係正選，就搞到洛里斯公開詐型，連球迷同隊友都話佢唔應該咁樣，咁嘅形勢下作客想開齋，難度好高囉！

雷丁射手着火有表現
新升班嘅雷丁開季2戰取得1和1負，表現唔算失禮，俄羅斯射手普格恩耶克加盟後迅速融入球隊，連埋聯賽盃已經連續2場有波入，中場古費利賽前都話全隊上下對於頭兩仗「有表現、無波贏」嘅情況好唔甘心，今晚主場肯定加多兩錢肉緊，要喺個勢麻麻哋嘅熱刺身上搶分絕對有機會。

頂占筍盤：雷丁

熱刺作客勝率低
‧熱刺上季聯賽19場作客得7勝6和6負，勝率37%。

‧雷丁上季喺英冠主場不敗率高達82%，23場當中更贏咗14場，勝出率達6成。

‧熱刺艾迪巴約係球隊上季首席客場殺手，入咗8球，但今季仲未開齋。

有線球彩台主持阿占
電郵：soccer64@cabletv.com.hk

PHONE波熱線：1831 678

「快樂星期天」開放時間：周日晚9:00至周一凌晨1:30