阿仙奴新兵掂 廠仔歸位
2012/09/18文:張健峰

等到喇！歐聯今晚終於殺到埋身！記得讀書嗰陣首次睇完通宵波再返學，就係1999年嘅歐聯決賽，當時由曼聯對拜仁，結果紅魔反勝2:1成為當年3冠王夠晒經典。今晚歐聯新丁蒙彼利埃喺B組主場迎戰阿仙奴，相信歐聯經驗豐富嘅「兵工廠」可以順利贏波，小讓平半捧上盤。

阿仙奴前隊長尹佩斯同中場桑治離隊後，補入前鋒基奧特、普多斯基同中場辛迪卡索拉都起到即時作用，特別係辛迪卡索拉，技術全面唔在講，仲令到「兵工廠」嘅進攻模式回復番法比加斯時代咁流暢同悅目，成為廠迷嘅新寵兒。

仲有前線嗰瓣，普多斯基就連續兩周聯賽取得入球，表現得到阿仙奴領隊雲格信任，當然要取代尹佩斯嘅地位唔係一時三刻嘅事，但只要保持狀態，入球肯定停不了。如果今晚連基奧特都能夠倒戈取得入球，對雲格嚟講，今季嘅收購可以話係完美。

蒙彼利埃不及上季
以法甲冠軍身份出戰嘅蒙彼利埃，今季戰績大不如前，踢咗5周聯賽位列14位，要衞冕成數不大，佢哋欠缺歐戰經驗，狀態又唔好，隨時被大炒都唔出奇，睇吓阿仙奴「蝦碌門神」施捷斯尼復出，可唔可以造就蒙彼利埃破蛋啦。

蒙彼利埃新季防守曳
‧蒙彼利埃開季6場未試過保持清白。

‧阿仙奴近8屆分組賽首戰得6勝2和。

‧兵工廠過去8次作客法國球會得5勝3和。

‧阿仙奴開季4場只失1球。

張峰來料：阿仙奴
歐聯B組