多蒙特做大「士」
2012/09/18文:亨格比利
死亡D組搶少分都有難 阿積士猛將星散唔怕反
皇馬加曼城，歐聯「死亡D組」咁惡踢，多蒙特想喺呢組突圍而出，今晚主場對牌面最弱嗰隊阿積士冇失分藉口。況且多蒙特上屆歐聯包艇出局咁羞家，賽前又畀拜仁名將艾芬保踩到上心口，呢啖氣唔出點掂？適逢阿積士今季星散，正正係「蜜蜂兵團」攞威好時機，一於捧1.95倍「讓主」。

畀拜仁名宿寸唔贏冇面
多蒙特上屆歐聯分組賽抽到好籤，對手分別係阿仙奴、馬賽同奧林比亞高斯，但最終只贏得1場就包艇出局，畀德國傳媒鬧到體無完膚，新季再戰歐聯仲邊敢掉以輕心吖？拜仁名將艾芬保賽前向《踢球者》狂踩多蒙特，指「蜜蜂兵團」一味死攻唔係辦法，冇Plan B只會死路一條，咁樣畀人質疑，教練高普唔火就假咯！

冇錯，呢支97年歐冠盃盟主今季係有香川真司轉投曼聯，但新指揮官馬高列奧斯嘅表現勁對辦，巴拉斯塞高斯基同馬里奧葛斯狀態大勇，就連羅拔利雲度夫斯基都喺上場聯賽開埋齋，整體實力仲Keep到。

阿積士新人未夠班
反觀阿積士呢邊就濕滯咯，主力好似後衞維頓漢、雲達韋爾、中場安尼達同特奧贊臣都離晒隊，冰島前鋒史基賀臣就因肩傷缺席所有分組賽，戰鬥力大跌Watt。教練法蘭迪保亞賽前就向荷蘭《電訊報》死撐，話雲達華治都係佢哋教出嚟，對以基斯甸艾歷臣為首嘅小將充滿信心同期望喎！

有睇歐國盃嘅巴打，都知丹麥新星基斯甸艾歷臣未夠火喉，法蘭迪保亞靠佢、艾達韋列特同新隊長施安迪莊孭重飛，喺荷甲蝦蝦霸霸就得啫，出到去歐洲想搵食冇咁易。

歐聯賽制
賽事採雙循環制。每組頭2名晉級16強，第3名則降格參加歐霸盃。