紐卡素防線穿窿 同諾域治鬥攻
2012/09/23文:Sherry
近排小妹都幾黑仔，無論返工放工咩鐘數都好，都硬係會塞車。第1次好火滾，但到第2、第3次嗰陣已經冇晒感覺，到第4次嘅時候，更加覺得塞車都唔錯吖，可以戴住個耳筒，專心細味每首歌嘅歌詞，慢慢享受一日中最寧靜、最私人嘅時間，如果唔趕時間的話。

中後場5將養傷
其實呢個世界就係咁，正所謂「沒有苦哪覺甜」，有時學識「苦中作樂」，都係一件好事吖。紐卡素開季成績麻麻，迄今英超4戰只得1勝，搞成咁，最大「元兇」係上季一對弗爆嘅箭頭丹巴巴亞同柏比斯施斯齊齊跌Watt，好彩上仗對愛華頓，丹巴巴亞終於搵番射門鞋，連入2粒吐烏氣，唔知今晚會唔會輪到柏比斯施斯發威呢？

講真，大家都知紐記對前鋒有料到，不過佢哋條防線嘅傷兵真係多到嚇死人，門神告魯爾、守將丹尼森遜、高洛仙尼、賴恩泰萊同防中迪奧迪全部打柴，想保持清白身？邊有咁易呀！對家諾域治條防線同樣豆腐，4場英超失7球，兩邊都係以攻為守，2.5倍「入球大」抵玩。

微博傳情：鏢隊賽攞冠軍
放心，小妹只係間中轉下「哲學Mode」啫，平時都Keep住笑口常開，開開心心嘅！好似上兩個星期咁，小妹嘅鏢隊bumble base，就齊心合力攞咗個鏢隊賽冠軍，小妹喺度借呢個機會，多謝各位隊友嘅努力同照顧，嚟緊一齊繼續加油！