全勝之師川迪再搶「芬」
2012/09/23文:自由恒

德甲奇兵法蘭克福唔信唔信又贏一場，開季聯賽4戰全勝，奉勸大家都冇乜必要同呢類強勢球隊作對，至於其他聯賽嘅全勝之師，包括荷甲嘅川迪同法甲嘅馬賽都會喺今晚主場出擊，值得再追寶尾。

海倫芬聯賽未贏過
兩隊聯賽5戰全勝嘅球隊當中，以川迪更值得信賴，畢竟佢哋以去季公平競技獎得主身份，早於7月初就要應付歐霸盃第一圈外圍賽，喺現階段狀態無疑比較優勝，主場出擊完全無懼聯賽仲未開齋嘅海倫芬。

對家海倫芬今季改由雲巴士頓領軍，本來大家都有所期望，點知自歐霸盃第3圈首回合大勝之後，居然連續8場都未贏過，近5戰仲有4仗失多過兩球或以上，造訪川迪都幾難作惡，1.9倍「讓球主勝」抵博。

足球重心：川迪、馬賽
馬膽推介：1場(3)卡加精神

近年季初5班嘅出色頭馬，無論係質新定壯年都可以繼續有貨賣，「卡加精神」於開鑼日贏到冇晒對手，高伯新終於搵到訓練竅門，排14檔都唔怕。