費托爭氣飛車屠狼
2012/09/25文:走肖
英聯盃第3圈英超強隊開始登場，車路士喺主場對狼隊，1.6倍「讓球主勝」算有肉食。除咗死魚，冇人受奚落會冇反應，隨住夏薩特威力下降，最近費蘭度托利斯又變番「廢托」，連古列治都踩佢係隱形人，呢場面對狼隊，費托有需要發威保住尊嚴同正選位置！

狼隊差幾班後防穿窿
現時車仔高踞英超榜首，又要兼顧歐聯分組賽，聯賽盃難免會安排主力休息，但史杜列治未好番，車仔得費托可打正箭頭，如無意外會繼續擔正，要知道曾執教車仔嘅古列治，近日狠批費托比賽遊魂連累球隊好似打少個，有咩可能唔嬲呀？

其實唔止古列治，車仔史上最成功領隊莫連奴，近排都話車仔冇咗杜奧巴熄晒火，暗示費托孭唔到飛。但即使咁迪馬堤奧依然撐佢，就算費托被換走黑面唔理人，迪馬堤奧都體諒同信任佢，假如費托唔想正選位不保，今場肯定要入波至得。

另一方面，狼隊降班前喺英超6次對車路士得1勝5負，期間有4次吞蛋至少淨輸2球，作客史丹福橋好易出事。更何況狼隊有威爾斯國家隊門將軒尼斯養傷，防線好唔掂，開季踢咗9場至最近2場至保持不失，加上狼隊上季試過喺英聯盃主場以2:5慘負曼城，級數差太遠好容易又被炒。

此外，12月6日喺日本舉行嘅世冠盃已進行抽籤，車路士首圈輪空，將於4強出戰亞冠盃對蒙特雷勝方，哥連泰斯則身處另一4強席位。