英聯盃第3圈今晚繼續爆發，曼聯喺主場對紐卡素冇得留手，入球大有1.5倍值得吼實！呢場波紅魔有王牌朗尼同中場費查回歸，當然要搏表現爭正選，何況紐卡素揚言收起所有正選球員，默契唔夠防線隨時一篤就散，一於博入球大唔使諗咁多！

賽前曼聯領隊費格遜冇講明用咩正選陣容，但點名話克服傷病嘅朗尼同費查，以及上緊位嘅中場尼克包維、左閘阿歷山大畢拿都好有機會打正選。不過點都好，朗尼受傷前畀尹佩斯同香川真司搶走正選位置，費查10個月以來首次為紅魔擔正孭飛，佢兩個如果唔把握機會表現，嚟緊有排坐冷板。

假如信得過朗尼抖夠發威，今場入球大真係玩得過，事關曼聯右閘拉菲爾達施華對利物浦時傷埋，如無意外，呢場又要安排翼鋒路爾斯華倫西亞移後串演右後衞，加上隊長尼曼查維迪喺上場對利物浦休息後，發現右膝要做手術估計抖兩個月，今季不穩嘅防線隨時又出醜，曼聯入得又失得，要開入球大絕對唔難。

另一方面，紐卡素上周中連歐霸盃分組賽對馬里迪莫都夠膽死收起晒啲主力，結果同對方踢成0:0，賽前有消息話，領隊柏杜今場又會用全副選出擊。唔好忘記，以往紐卡素曾經係曼聯主要爭標對手，積落唔少牙齒印，作客奧脫福又點會咁容易守得住？惟有同對手搏拳希望輸得冇咁肉酸，1.5倍入球大好路。

‧自1972年起，曼聯主場未曾不敵紐卡素。

‧曼聯贏波嘅話，將會係史上第100場英聯盃勝仗。

‧紅魔37次主場出戰英聯盃，31次勝出。

‧紐卡素對上8屆英聯盃有7次被英超球隊淘汰。

話晒曼聯唔係夫添出擊，比賽初段真係未必搶得優勢，更何況對上4場比賽，其實紅魔有3場半場同對手打和，所以睇好曼聯贏波，又嫌1.36倍主勝冇肉食，就不妨試吓冷敲3.9倍和主，博連續5場開半場入球細嘅紐卡素，完半場前可以偷雞保住不敗。另外如果想玩得簡單啲，都可以博入球單，事關曼聯開季6場有5場開入球單，幾旺o架！