德乙周中快車今晚繼續上演，波琴喺主場對凱沙羅頓受讓平半博得過。由於浮唔番上德甲導致收入大減，現時波琴負債纍纍，高層下令要搞番好盤數，暗示再冇成績就會大清洗，主場出擊唔踢爭氣波開下盤點得呀？

自從鄭大世離隊，波琴唔止升班希望變得更渺茫，連有關佢哋嘅新聞都有限，最慘就係乾貴士暑假轉投法蘭克福後踢到識飛，證明波琴踢唔起未必關球員質素事，而係戰術同內部氣氛有問題。正當波琴高層同球迷勁閉翳，上季財政報告同時出爐，錄得224萬歐元赤字，家陣負債達680萬歐元，近日波琴高層暗示，假如戰績冇改善唔排除賣人，新加盟嘅川崎前鋒中場田坂祐介應該識做。

大家知啦，今季歐洲轉會市場靜到暈，突然被趕扯好難落班，鬥心搭夠加連續3場冇失波，至少受讓玩得過。對家凱沙羅頓未輸過有4勝3和，不過佢哋條防線勁曳，開季得1場保持清白點信得過？