法蘭克福鬥心強 搶攻弗賴堡
2012/09/30文:卡爾萬
法蘭克福喺上周中德甲快車落後2球下，最終3:3逼和衞冕冠軍多蒙特至今5場不敗，今輪再度主場出擊迎戰弗賴堡，憑住連續3場有波入嘅乾貴士及美亞等一眾打不死球員，有望延續球隊強勢，卡爾萬睇好佢哋至少淨贏2球，撐2.58倍「讓球主勝」。

開季5場不敗
法蘭克福逼和多蒙特後，開季5戰錄得4勝1和，隊長派文舒維加接受訪問嗰陣已經話為下場作準備：「對弗賴堡我哋會以對多蒙特下半場嘅態度去面對。」的確，法蘭克福之前對利華古遜已試過反勝，加埋逼和多蒙特，睇得出派文舒維加唔係齋噏，球隊的確係鬥志同後勁一流。

對手弗賴堡就差得遠喇，雖然佢哋唯一贏賀芬咸嗰場都係反勝，但上場對雲達不來梅先勝後敗，明顯反勝嗰場只係虛火，今場就算得真羅辛度一名傷兵，不過對住「托弗」嘅法蘭克福，試問又點夠砌呀！