愛奴馬體會做大騷
2012/09/30文:張健峰
愛斯賓奴今晚西甲喺主場迎戰狀態大勇嘅馬德里體育會，表面睇客隊贏面高唱入雲，事關「愛奴」開季1和4負家陣喺積分榜排尾2，馬體會剛好相反得到4勝1和佳績排第2。不過，睇番兩隊嘅對賽往績，碰親頭都好似齋攻唔識守咁，對上8次喺西甲交手全部開大，咁好路，唔係唔追大吖嘛？

雖然5戰僅得1分，但睇番愛斯賓奴嘅表現其實唔係想象中咁差，5場比賽入面有3場能夠喺半場領先，證明班波中前場有一定質素，諸如意大利前鋒森梅利朗高近3場就轟入2粒，有佢喺前線孭飛，火力信得過o架。球隊成績曳只係衰在每次經過半場休息後，集中力就下降，搞到前面入埋唔夠後面輸，只要正視吓呢個問題，又保持到入球能力嘅話，成績自然會回升。

法卡奧打柴 幸得分點多
馬體會開季至今狀態好、成績佳，全靠中前場火力強勁，周不時可以先開紀錄領先到尾。睇番統計數據，佢哋今季平均每5次射門就製造1個入波，入球率係全西甲最強，就算後防唔多穩陣，都可靠喪攻能力去保住勝局，簡單啲講係入得又失得嘅大盤客最愛！

當然，馬體會今仗會有首席射手法卡奧因傷缺陣，但係佢哋勝在得分點多，唔計法卡奧，今季已經有7名球員開咗齋。最後睇埋兩班波近期數據，馬體會已經係連續6場開出入球大，愛斯賓奴近6場又係有5場「大」波，今仗兩班波正面交鋒，唔係唔大嘛？

張峰來料：愛斯賓奴

馬體會6連勝
‧馬體會最近喺各項賽事6連勝。

‧馬體會連開6場入球大。

‧兩隊最近10次對賽有7次開大。

愛斯賓奴輸後勁博「客客」
馬體會今季狀態大勇，最近6場賽事全勝，佢哋除咗上場對貝迪斯半場落後，其餘各場半場都領先對手，今晚作客對住今季未贏過嘅愛斯賓奴，半場領先應該冇問題。主隊今季多次喺半場領先嘅情況下，最後畀對手逼和甚至反勝，證明佢哋下半場防守唔夠集中，今晚對住入球分布點廣嘅馬體會隨時輸多兩粒，買大之餘一於再博2.75倍「客客」。