基達菲射爆馬略卡
2012/10/01文:走肖
西甲周一獨腳戲有直播睇，基達菲今晚主場對馬略卡，主勝值得吼實。雖然基達菲開季表現唔掂，但摩洛哥中場巴拉達彈出成為曼城收購目標，據佢經理人講，最近幾個星期曼城一直派球探喺西班牙現場睇辦，試問佢點會唔搏命？

雖然基達菲開季後聯賽得1勝1和3負，但其實當中代表作係主場以2:1打沉皇家馬德里，今季有3個聯賽入球嘅巴拉達，更加成為曼城重點收購目標，佢經理人更大爆，最近幾場曼城安排特定球探入場睇辦，啱用就會喺1月出價搶人。大家知啦，加盟曼城話唔定好過中六合彩，有邊個會喺呢個時候揸流攤呀？

馬略卡財困計劃簽中超兵
無錯基達菲今場有中堅阿歷西斯停賽，但佢畢竟高峰期己過，缺陣未必會致命，更何況上季基達菲作客以2:1砌低馬略卡，正係由巴拉達梅開二度奠勝，呢場係佢發威騷哥厘最佳時機，配合曾經為馬略卡攻入大量入球嘅古爾沙倒戈出戰，其實基達菲牌面絕對唔曳，係時候開多場主勝。

對家方面，馬略卡向來作客腳軟唔需要多介紹，而且今季新加盟嘅墨西哥國腳杜斯山度士剛啱好番，就算落到場都肯定唔係100%狀態，唔值得睇太高。仲有呀，現時馬略卡財政問題依然嚴重，甚至衰到諗住要去中超簽平貨補充實力，開季後有3勝2和似虛火，作客基達菲隨時打回原形，1分都未必有本事搶到。