廣州「大」反擊
2012/10/02文:走肖

亞冠盃8強次回合大戰今晚上演，中超盟主FC廣州喺主場對沙特班霸伊蒂哈德，1.65倍入球大非常抵玩。首回合廣州恒大兩度領先下輸2:4，據知教練納比為咗贏波反勝，決定放棄單箭頭陣式，改用352強攻對手，而且下令喺中秋節加操，搏殺格入球唔慌少。

改踢352郜林巴里奧斯拍住上
恒大炒咗冠軍教練李章洙，拉攏世盃冠軍教頭納比執教，原本諗住中超同亞冠盃雙贏，點知依家聯賽爭標形勢被動，亞冠盃首回合大落後，為免失威，消息話納比打算派中國國腳郜林同巴拉圭射手巴里奧斯同場上陣，加上首回合傷出嘅巴西前鋒梅里基傷愈，實行用「352」陣式狂攻，夠條件同對手駁火。

除此之外，恒大仲有首回合停賽嘅中場趙旭日同後衞張琳芃可以復出，陣容完整得多，既然首回合作客都入兩球，前日中秋節又特別進行1個鐘頭操練催谷球員狀態，主場出擊冇理由食白果。仲有呀，其實恒大中堅馮瀟霆未完全好番，首回合連番出醜成為輸波罪人，失波機會高好易開入球騷。

對家伊蒂哈德首回合前傳出隊長穆罕默德羅亞兄長去世，但佢堅持上陣領軍，仲射入12碼幫球隊反勝，而且新加盟嘅喀麥隆中場麥巴美，曾經効力大連阿爾濱，非常清楚恒大打法，有佢爆料可以作出針對性部署，只要首回合梅開二度嘅沙特射手夏沙斯保持水準，今場有大把入波畀大家歎。

首回合：FC客負2:4

亞冠盃賽制
採主客兩回合制，今輪為8強次回合。兩回合計打和將計算作客入球，若未能分出勝負則於次回合法定時間後加時30分鐘，再和則互射12碼決勝。