博紅魔僅熟 防線開窿焗打穩陣波
2012/10/02文:力奇
曼聯吸收過上屆歐聯分組賽出局嘅教訓，睇怕今晚喺歐聯H組出訪羅馬尼亞克盧日都唔敢再玩嘢，有朗尼復任正選3分唔難攞，只係考慮到紅魔今季防線走樣幾乎場場有失波，唔易大勝，今場一於冷敲3.4倍「讓球和」。

周三凌晨2:45直播）

賽前紅魔領隊費格遜已經話明，今仗只會起用有經驗嘅球員出戰：「克盧日唔係善男信女，佢哋喺外圍賽可以兩回合淘汰巴素利，上輪作客又砌低布拉加，點可以睇小佢哋！」有費Sir金口保證，據知上輪聯賽復出踢到鬼咁生猛嘅射手朗尼，將會復任正選，佢更會同今季新加盟即刻有貨交嘅尹佩斯、香川真司組成超級進攻鐵三角，要撕破對手防線自然唔係難事。

莊尼伊雲斯未必踢得
不過，力奇始終擔心紅魔防線唔穩陣，睇番佢哋今季8場正式比賽只得1場可以保住清白之身，而且又大鬧中堅荒，菲爾鍾斯同基斯史摩寧仲長抖緊，最信得過嘅隊長尼曼查維迪近仗做埋十字兵，莊尼伊雲斯上輪又因為小腿傷埋提早退下火線，今仗唔知踢唔踢得，費Sir隨時要用新兵史葛胡頓擔正，都咪話唔牙煙。

再講，曼聯今季6場勝仗有5場都係僅贏1球，今晚佢哋去到吸血僵屍德古拉伯爵老家「僵屍之城」特蘭西瓦尼亞，出戰神秘之師克盧日，點計都應該好難全身而退，贏都唔慌係大炒，3.4倍「讓球和」絕對冷敲得過。

歐聯H組