祖記穩陣波有薩無賠
2012/10/02文:張健峰
今晚歐聯E組分組賽，祖雲達斯主場迎戰近幾季喺歐洲賽場有好表現嘅薩克達，以祖記一向穩陣嘅作風，面對牌面比自己次一級嘅球隊甚少甩拖，大勝機會雖然唔高， 但往往能夠點到即止，贏你一兩球就收手，今場祖記個主勝好穩陣。

薩克達聯賽全勝未受考驗
雖然祖記喺歐聯舞台已經唔係爭標熱門，但今季以5勝1和佳績高踞意甲榜首， 加埋首輪歐聯作客逼和車路士，已經7戰不敗， 狀態一流。佢哋之所以有咁好表現，保方同派路兩位老將功不可沒，門將保方今季聯賽6場只失3球， 絕對係令人放心嘅老大哥。而派路轉投祖記後尋回第二春，有呢位中場大腦掌管進攻命脈，祖記6場聯賽已經入咗15球，上場大勝羅馬4:1一戰， 佢仲為球隊先開紀錄添。

烏克蘭聯賽開咗波10輪，薩克達10戰10勝所向無敵。好嘅一面就係佢哋班人狀態好，不過亦證明聯賽水準好參差，但去到歐聯係一大考驗，分組賽首輪佢哋主場擊敗牌面較低嘅洛斯查蘭特，今晚作客祖記隨時見底，小弟睇好祖記可憑經驗小勝， 2:0同2:1係心水波膽， 不妨一試。

歐聯E組

張峰來料：祖雲達斯