今季飽受傷患問題困擾嘅英超球隊紐卡素，今晚喺歐霸盃D組主場迎戰法甲波爾多，莫講話贏波，隨時輸埋都唔出奇，皆因佢哋主帥柏杜從來都唔重視歐霸盃，只會派出大批小將或副選上陣，今次仲話明要用3個「90後」攻堅，仲點贏波？平手盤安高捧2倍「讓客」。

「喜鵲」今季表現麻麻，至今10戰只得3勝5和2負。最慘係柏杜一向認為英超大過天，今個禮拜佢哋要火併曼聯，今晚真係唔使望佢會出強陣。賽前柏杜就大讚陣內小將技術好，話17歲小將阿當甘保級數拍得住艾美奧比，今晚會擔正。同佢拍檔則係艾美奧比細佬森美艾美奧比，仲有中場又係用個啱啱20歲嘅胡基治，信唔信得過？唔使安高多講啦！

仲有，佢哋條防線又係甩皮甩骨，門將告魯爾、守將丹尼森遜、史提芬泰萊同高洛仙尼都會因傷缺陣，又要大執位，真係 見都覺得牙煙。反觀波爾多，今季喺各項賽事10場不敗，狀態極佳，特別係近3戰，夾埋入咗8球，火力全面提升，今次出訪聖占士公園球場，唔難做到坐和望贏。

現為分組賽階段，48隊分成12組，每組4隊，採主客雙循環制，贏3分，和1分，負0分。每組首兩名躋身下圈。

歐霸盃D組