新一季澳職今日開鑼，揭幕戰即有墨爾本打吡上演。主場出擊嘅墨爾本勝利今季搵嚟名帥普斯迪高路接手，大打進攻足球實力提升，反觀墨爾本雄心新季要由經驗不足嘅前澳洲國腳艾萊斯領軍兼陣容大換血，實力、經驗輸晒，勝利讓平半，1.79倍上盤穩陣。

勝利今季由總冠軍獅吼撬得普斯迪高路接手，目標直指總冠軍。球隊經過4個月改造，已經由防守型變成進攻型踢法，就算話唔可以踢到似獅吼一樣流暢，但踢得出7、8成水平已經夠殺，喺隊長利查及時傷愈下，要贏波話咁易啦！

雄心主帥雲史卓柏今夏轉往墨西哥發展，球隊最後決定提拔青年軍教頭艾萊斯頂替，始終頂級聯賽領軍經驗係零，首戰面對勁敵認真牙煙。仲有，佢哋休季期走咗7名主力，再補入9位新人，融合需時，今鋪作客都係等做炮灰。

另外，足智彩將會為今季澳職同今輪起嘅德甲開設角球大細，勝利同雄心上季平均每場角球分別係8.41個同7.26個，今場角球大細中位數係10.5球，1.73倍角球細值得一捧！