目前英超最有霸氣嘅球隊，非車路士莫屬！佢哋唔單止喺聯賽6戰5勝1和，周中喺歐聯仲大炒洛斯查蘭特，阿占最欣賞嘅係佢哋條優雅中場線，3位後上殺手夏薩特、桑馬達同奧斯卡都弗到漏，之不過考慮到佢哋條防線略嫌谷得太前，今鋪遇上有前冇後嘅諾域治，玩1.45倍入球大最穩陣！

隨住曼市雙雄齊齊跌Watt，車路士已經成為英超最可靠嘅班霸。佢哋喺上周作客贏埋阿仙奴，家陣喺聯賽榜已經Lead住第3位嘅曼聯4分，當中最大嘅功臣，梗係佢哋3位充滿侵略性嘅指揮官啦！

事實上，車路士今季冇咗杜奧巴齋靠費托，起初好多人都唔睇好佢哋，又批評夏薩特、桑馬達同奧斯卡杜斯山度士踢法太似，好難起到化學作用，點不知迪馬堤奧將佢哋擺埋一齊，效果竟然出奇地好，3大後上王往往喺費托掩護下拎到入波，帶挈「藍戰士」近5仗喪入15粒！當中不得不提桑馬達，呢位西班牙翼鋒經過季初一輪小低潮後全面回勇，近3仗有4球進帳，難怪迪馬堤奧都叫林柏特要做好坐冷板嘅準備啦！

之不過咁，正正因為車路士依家玩優美進攻，中場工兵只係得件拉美利斯，班守將好似加利卡希爾同大衞雷斯咁，都係入波叻過攔截，係，「藍戰士」贏面係好高，不過萬一後面失番一兩粒，買咗「讓主」嘅朋友，隨時要驚住贏錢就無謂啦！

仲有，除咗話車仔條防線唔係密不透風外，查實對家諾域治都有一定入球能力o架！呢班波踢法有前冇後，上仗夠膽死同利記鬥攻開2:5，佢哋位王牌前鋒格蘭荷特喺上場開齋，信心返晒嚟，尋日仲公開話會用大量入球，去證明鶴臣唔揀佢入英格蘭國家隊係錯喎！口氣係大咗啲，不過呢位柱躉前鋒確係有料嘅，咪忘記諾域治對住利物浦同熱刺都入到波，與其揀1.58倍「讓主」驚餐飽，倒不如轉玩入球大，隨時十幾分鐘已經可以收錢，度定下一場賽事添！

‧車路士最近6次主場迎戰「金絲雀」，有5次都開大。

‧雙方近6次對賽，車路士5勝1和未輸過。

‧「藍戰士」最近4次主場鬥諾域治，都淨勝2球以上。

有線球彩台主持阿占

球彩電郵：soccer64@cabletv.com.hk

網上討論：http://fb.com/icable64

Phone波熱線：1831678　

開放時間：周六晚9:00至11:30