國米強鋒攞A
2012/10/07文:亨格比利
「米蘭打吡」爆發兄弟對決！柏仙尼同卡斯辛奴今季互換東家，呢對好兄弟今晚正面交鋒，總算為被視為近年最削嘅「米蘭打吡」帶嚟些少Talking Point。由卡斯辛奴領銜鋒線嘅國米重新起飛，周中歐霸盃仲收起大批主將留力，擺明想踩多腳送AC教頭阿里基一程，受讓平半當然捧下盤。

打吡波飛賣少2.5萬張
國米早兩年嘅三冠主將施薩索拉斯、馬爾干同盧斯奧離隊，AC亦有伊巴謙莫域同堤亞高施華鬆人，流失球星加上戰績下滑，令呢場打吡戰失色不少。據《米蘭體育報》所講，截至前日為止呢場波只係賣咗5.5萬張波飛，比對上兩季賣少2.5萬張之餘，亦係近26年嚟銷情最滯嘅1次，好彩，卡斯辛奴同柏仙尼合演嘅兄弟對決，依然夠晒睇頭。

呢對好兄弟喺森多利亞合作嗰兩年，合力炮製79個「士哥」，去季分投米蘭雙雄，今季仲互換球會，賽前國米前鋒卡斯辛奴就話兄弟都冇情講，話未驚過柏仙尼喎！查實卡斯辛奴咁囂又唔係冇道理，畢竟連埋意甲同歐霸，「藍黑軍」已經錄得3連勝，周中收起7位主力依然輕鬆大勝尼菲治3:1，當中卡斯辛奴、隊長辛尼迪同上季兩鬥AC勁入4粒嘅迪亞高米列圖直情冇隨隊去阿塞拜疆首都巴庫，留晒力等劏AC咁款喎！

AC阿帥今季「主場」未開齋
名義上主場嘅AC，雖然喺周中歐聯贏咗辛尼特，但主帥阿里基無論布陣抑或調動都受盡質疑，今仗再有差池隨時冇得撈。亨格比利發現咗樣嘢，就係阿里基新季喺自己地頭領軍出擊未贏過，上場意甲主場贏卡利亞里亦因為佢坐波監，由助教泰索迪帶隊先贏到，阿帥都算黑腳咯！

AC前鋒艾沙拉維近4仗入5球，樹大招風成咁，隨時畀森美爾嘜死。仲有喎，阿里基新季8戰已經試過6對中堅組合，證明佢一直未搵到適合嘅防守陣容，今仗仲學人讓波？咪玩啦！

米蘭雙雄旺開大
‧國米去季意甲雙殺AC，分別贏1:0、4:2。

‧今季聯賽國米未試過半場落後。

‧AC近6次以主場名義鬥國米，有4次開大。

兩軍慢熱吼半場0:0
睇番今季意甲數據，AC米蘭6輪聯賽有4仗上半場都入唔到波，往往要到換邊後先入局。至於國米話就話打352陣式，但查實長友佑都同艾華路佩雷拉呢對翼衞都經常回防，預計今戰會喺下半場先有紀錄，2.55倍嘅半場0:0波膽玩得過吖！