熱刺正氣 係時候發維
2012/10/07文:Sherry
上星期小妹同位好朋友一齊睇西甲直播，親眼見證華拉度列「血洗」勁乞人憎嘅華歷簡奴，真係大快人心！小妹只係買咗10蚊主其他，雖然唔係贏好多，不過見到「惡人有惡報」，嗰種快感就好似睇電視劇，見到啲奸人受到法律制裁咁，勁爽！

迪科爾返晒嚟近6戰4勝
喺小妹心目中，以前由夏利列納執教嘅熱刺，一樣係大奸大惡之徒，好彩，呢支倫敦勁旅季前改由保亞斯揸旗後，變得正氣好多，狀態唔掂嗰排輸到直，到慢慢回勇就贏開有條路，近6戰錄得4勝2和，人腳係就係冇上季咁好，伊高圖、卡保奧、積基李華摩亞同柏加又未出得，不過射手迪科爾搵番對射門鞋，加里夫巴利又踢到識飛，就連新加盟嘅丹普西同迪比利都有貨交，上周聯賽仲打破埋宿命搞掂曼聯添，狀態弗成咁，唔係唔撐呀？

對家維拉就慘情咯，自從奧尼爾離任後，呢班波已淪為護級分子，咁又難怪嘅，維拉呢隊波質素最好嗰件戴倫賓特沉到爆，班守將又長期揸住個藥煲，禾諾克、李察鄧尼、艾利蘭同加利加特拿齊齊打柴，咪忘記上季佢哋作客熱刺淨吞2蛋，連往績都輸埋，今鋪想翻身？咪玩啦！一於捧熱刺2.1倍「讓主」啦！

嗚呀！好掛住舊同事呀！
小妹自從返咗新工之後，足足瘦咗成5磅！好多Friends話我可以免費瘦身，恨都恨唔到喎！查實係o架，呢份工工作量係大啲，不過堅係學到好多嘢，尋晚小妹仲同班同事去唱K減壓，正呀！雖然新有新好，不過小妹都一樣有掛住以前班機場同事o架！喂，幾時出嚟玩番晚先？