「蜜蜂兵」發惡狂螫漢諾威
2012/10/07文:查理阿蛋
今晚德甲由多蒙特作客「主場王」漢諾威，「蜜蜂軍團」前線攻擊力之強連曼城都嗌救命，今場對住啱啱喺歐霸盃惡戰完嘅漢諾威，入波相信冇難度，小妹決定捧1.9倍上盤！

漢諾威攰爆未回氣
提起多蒙特，相信大家都會諗起佢哋啱啱喺歐聯作客曼城場波，講真，如果唔係「藍月亮」門將赫特嘅神級表現，班「蜜蜂仔」早就大勝一場，馬里奧葛斯亦唔使連射4球靚波都食白果。更令小妹安慰嘅係馬高列奧斯同隊友愈夾愈好，呢位進攻中場上場創造咗唔少機會，令香川真司離隊嘅影響愈嚟愈細，多蒙特亦慢慢重現上季嘅王者氣勢，今場有力再演華麗入球騷o架！雖然話中堅曉姆斯有傷唔踢得，不過後備嘅菲臘比辛坦拿表現唔錯，相信影響唔會太大。

另邊廂嘅漢諾威近期表現相當可人，近4仗主場賽事全部贏晒，就算上周中歐霸盃10人應戰亦能反勝利雲特，「打不死」精神連教練史隆卡都大讚，但佢哋踢完呢場惡戰後元氣大傷，仲比多蒙特少1日時間休息添，要擊敗呢支衞冕冠軍的確好有難度。