噴射機讓「德」起
2012/10/07文:卡爾萬

今季澳職新兵焦點落喺迪比亞路、小野伸二同希斯基身上，前兩者喺尋日亮相後，今日輪到効力紐卡素噴射機嘅希斯基登場，佢哋對住阿德萊德聯，有力打響頭炮，讓平半博1.99倍上盤。

紐卡素噴射機08年成功攞到總冠軍，但之後嗰季竟然包尾收場，對佢哋嚟講簡直係恥辱，就算近兩年稍為復甦，但都打唔到入季後賽，主因係防線唔穩陣失球數字驚人。教練雲艾蒙特亦意識到問題所在，決心重組防線，除咗先後放走6名中後場球員外，仲簽入葛雲、祖舒米素爾等一班有澳職經驗嘅守將，配合埋身體對抗性極強嘅希斯基打中鋒搵食，經過季前磨合防線煥然一新，成績有望回升。

阿德萊德聯亞冠盃搏殘
阿德萊德聯今季除咗由阿甲聖馬田聖祖安簽入翼鋒卡路斯卡之外，冇乜其他重大收購，繼續靠沙治奧雲迪克同維度錫帶住班波。不過要留意佢哋啱啱喺亞冠盃8強次回合搏足全場之後，加時輸畀賓約哥出局，球員未必回得切氣，士氣亦唔慌好得去邊，今場對住志切喺聯賽重拾佳績嘅噴射機未必夠打，噴射機上盤捧得過。