法國留力冇贏波「本」錢
2012/10/12文:安高
「亞洲一哥」日本今個國際賽期將會踩過界，殺出亞洲連鬥兩大足球強國法國同巴西，其中今晚就先會喺巴黎法國球場挑戰「高盧雄雞」。雖然牌面睇落輸蝕，不過安高認為日本近年進步神速加上鬥心足，反而法國要留力下周喺世盃外圍賽火併西班牙，仲點讓得起波？梗係捧2.22倍「讓球客勝」啦！

日本今次連鬥法國同巴西，領隊沙哲朗尼話明係個大考驗，想測試佢哋嘅真正實力。賽前日本進攻中場本田圭佑信心十足咁話，覺得日本同法、巴根本處身同一水平，老實講，日本要撼贏巴西似乎仲差啲，但要同近年麻煩多多嘅褪色強隊法國相比，絕對唔失禮囉。

日本徵召13名旅歐球員
睇番日本今次點兵，以本田圭佑同香川真司為首嘅13名旅歐球員都在陣，前線仲有喺德甲法蘭克福Fit到漏油嘅乾貴士孭飛，陣容完整加上同強隊一併嘅決心，爆冷贏波都唔出奇。

法國呢邊，領隊迪甘斯話就話會認真踢，但考慮到下周仲要同西班牙踢世盃外圍賽，點會冇保留吖！再者，佢哋今場其實大鬧防中荒，戴亞比同馬胡巴都因傷落選，本來頂住呢個位嘅卡比耶，又話胃痛或會缺陣，加埋中堅哥斯尼尋日練波都同列貝利碰撞傷埋，唔知踢唔踢得，仲點贏波吖？