阿根廷美斯「大」報復
2012/10/12文:查理阿蛋

烏拉圭講明駁火唔認輸
朝南美洲區嘅世盃外圍賽，將會上演阿根廷對烏拉圭呢場精彩大戰，主隊美斯入球停不了，烏拉圭雖然近況麻麻，但係蘇亞雷斯、卡雲尼呢啲頂級射手又點會咁易認輸？兩邊都火力十足，小妹梗係撐1.68倍入球大啦！

升呢做隊長愈踢愈順
美斯早排喺國家隊大爆發贏得國民一致掌聲，而且喺西甲打吡戰仲同C朗齊齊展現神級球技，相信阿根廷球迷等佢喺國際賽表演等到頸都長！的確，美斯「升呢」做隊長後表現突飛猛進，近7場國家隊賽事仲喪入10球，帶領阿根廷喺近4次主場賽事錄得3勝1和兼入12球嘅佳績添！美斯早排向《霍士體育電台》自爆做隊長後，同隊友嘅關係同以前一樣咁好，仲話勁享受踢國際賽，唔怪得「美斯仔」愈踢愈順啦！

誓報美洲盃出局之仇
「球王」今場絕對有原因搏命，事關喺2011年嘅美洲國家盃8強戰中，阿根廷正正係畀烏拉圭淘汰，嗰次之後美斯喺國內人氣跌至新低，仲經常畀粉絲柴台，依家踢到風生水起仲唔趁機出番啖氣咩？加上隊友羅美路都開到聲講明要報仇，美斯作為隊長，梗係要做番齣好戲啦，有佢拍住阿古路同迪馬利亞，有咁嘅「卡士」又邊使擔心冇士哥？

另邊廂嘅烏拉圭捧走美洲國家盃後就大跌Watt，近7場只贏過1場咁大把，仲曾經喺世盃外慘吞哥倫比亞4蛋，再係咁落去，出線隨時有暗湧，仲唔發力狂追咩？蘇亞雷斯都知好難守得住阿根廷，所以賽前講明會同對方駁火爭取一線生機，咁啱佢同卡雲尼近排喺球會入波唔少，加埋經驗老到嘅科蘭，實行同美斯嚟個大鬥法，就算輸波都要做番場入球騷！

世盃外南美洲區