英格蘭出盡全「力」劏魚腩
2012/10/12文:卡爾萬
世盃外圍賽H組今晚繼續開騷，英格蘭坐鎮溫布萊迎戰「魚腩」聖馬力諾。早排艾殊利高爾爆粗鬧足總惹起軒然大波，不過隨住威廉王子當面「教訓」A高，件事終於有望平息，上下一心嘅「三獅兵」呢場勢必大炒靠業餘國腳支撐嘅聖馬力諾，重奪H組榜首位置，中位數5.5球照撐1.57倍入球大。

朗尼做「喼頓」
近嚟A高同足總單嘢搞到咁大，搞到日前威廉王子去新訓練基地幫國腳打氣之餘，亦順便「教訓」吓個奀皮仔A高，最終大家笑晒口、揸晒手咁，既然「王子」叫到，相信A高都會識做，班國腳今鋪亦唔敢揸流攤。雖然林柏特同補選嘅賴恩貝特蘭都肯定缺陣，謝拉特亦要停賽，但今鋪對住魚腩，又有首次喺正式國際賽做隊長嘅朗尼撐住，實質影響唔大。至於喺曼城救出唔少必入波嘅赫特，受訪嗰陣亦話：「我哋唔可以預視到比賽進程，但我哋會保持警覺，更希望喺唔使掂個波嘅情況下贏10:0。」 佢咁講，即係話「三獅兵」對住「魚腩」亦唔會手軟囉！

聖馬力諾一直都係靠班業餘國腳撐場，佢哋全部都有正職，加斯柏朗尼、雲魯斯等球員更加係有錢生意佬，分分鐘佢哋錫身過「三獅兵」都未定。就算齋講實力，佢哋近10場作客波就失咗成70球，邊夠揪呀？呢場波英格蘭「讓主」開到「-5」，賠率係1.62倍，而入球大細就5.5球，個大係1.57倍，雖則話聖馬力諾入波機會少之又少，之但係賠率差嗰少少，咁梗係捧入球大穩陣啲啦！

世盃外歐洲區H組