英格蘭啱啱喺世界盃外圍賽怒炒聖馬力諾8蛋，身為U21嘅師弟又點可以失威呢？咪忘記「幼獅」主帥皮雅斯就快決定U21歐國盃名單，今晚班「獅仔」喺熱身賽主場鬥奧地利U21，肯定會大騷哥利，繼上仗炒起羅馬尼亞U21後再大捷一場，1.73倍「讓主」唔怕追寶尾。

自從喺2011年11月輸畀比利時1:2後，「幼獅」已經接近17個月未輸過波，兼保持緊722分鐘嘅清白身，咁又係嘅，睇番佢哋嘅大軍名單，有丹尼路斯、舒維爾、佐敦軒達臣、史達寧等英超球星壓陣，喺U21嚟講，實力梗係超晒班啦！仲有，今仗係「幼獅」出戰U21歐國盃前嘅最後檢閱，皮雅斯好大機會帶埋今晚就定大軍腹稿，為討好主帥，班人肯定砌盡啦！

對家奧地利U21雖然近5戰不敗，不過對手只係馬爾他、剛果之流，一對強隊好似荷蘭咁就大敗1:4，擺明未夠班。再講，呢班奧地利小將多數喺國內落班，只得中場賀斯侯沙外流去到史特加，好難令人有信心喎！