QPR心急搶分 平手「根」得過

近期成日落雨，搞到都無晒心情做嘢，早兩日仲發現屋企滲水，真係屋漏偏逢連夜雨，個人都灰晒。講到灰，今晚主角昆士柏流浪亦一樣，佢哋依家攞住23分，排喺英超尾二，嚟緊要護級真係一分都不能少！

坦白講，QPR嘅人腳其實唔差，前中後球員都算略有名氣，可惜踢起上嚟始終唔多夾，踢咗31場波只贏得4場，係全英超贏波最少嘅球隊，今晚護級戰對住排尾四、有30分喺手嘅韋根，當然要落力搶。普遍莊家都開出QPR讓平半，但足智彩就再穩陣啲開平手盤，認為QPR呢場坐走望贏。

韋根高水筍過龍
其實QPR自夏利列納接掌後已有起色，3月份分別贏過新特蘭同修咸頓，可惜始終無以為繼，上輪作客對富咸其實打得唔差，弊在一開波未集中精神就畀人入咗兩粒，搞到後尾打多個人都係輸波收場。但有樣嘢值得注意，就係QPR近4戰每場最少都有兩個「士哥」，起碼證明班波仲未放棄護級。當中26歲嘅法國前鋒雷米，近4場就o趙入3粒，加埋兩位英格蘭中場贊拿斯同安祖斯唐辛分別各入兩球，今晚主場出擊相信一定會繼續搏老命搶分。

韋根呢排狀態唔曳，連足總盃在內，近7戰只係輸過畀利物浦同車路士兩支強隊，其餘全部贏晒。佢哋依家雖有30分喺手，但仲未擺脫護級漩渦，事關第12位到第18位嘅球隊只係相差4分，所以嚟緊每場都係護級生死戰，不過以韋根近況同盤路計，今晚平手高水似乎過分好分，都係避之則吉。QPR喺主場粉絲支持下，記住一定要踢番場代表作呀！