今晚英超新特蘭主場迎戰修咸頓，論戲碼吸引力唔算大，不過肉緊程度就可能係今晚英超之最！事關今晚邊隊拎3分就幾乎肯定「上岸」，「黑貓」近況無疑比修咸頓好，加上煞科日佢哋要作客熱刺，搶分難度極高，所以今晚一定當決賽咁踢，平手盤主勝有1.92倍當然抵撐啦！

自從新特蘭由迪肯尼奧接手後，成班波即時大反彈，雖然經過維拉血洗，但上仗佢哋踢少個都逼和史篤城，就知呢班波嘅鬥志係幾咁旺盛。咁又係，「黑貓」班人多數都係打仔格，腳法細膩嗰件係阿當莊臣同查理阿當，呢兩位翼鋒經常發難，製造唔少威脅，相信今晚都係靠佢哋食胡。

擁有列基林拔同積洛迪古斯等攻擊好手嘅修咸頓，雖然只係升班分子，但今季一直崇尚進攻，表現係就係有娛樂性，可惜防線就因此搞到甩甩漏漏，最弊係佢哋近期啞晒火，已經連續3場食白果，近4戰又未贏過，今晚作客新特蘭，好難望佢哋反彈。