「小強」韋根唔驚兵工廠

「英超小強」繼續發威！隨住紐卡素、諾域治同新特蘭喺周日英超齊齊搶分，足總盃新科冠軍韋根今晚作客阿仙奴嘅護級生死戰已非勝不可，形勢咁惡劣又點會因大戰過後「揸流攤」？小妹相信韋根肯定再次發揮擊敗曼城捧盃嘅小宇宙，以佢哋嘅領隊功力同球員質素，要喺兵工廠地頭保住不敗唔係空談，一於扒冷要3.3倍「讓客」啦！

雖然啱啱捧完盃未開心完，但韋根唔似得史雲斯咁可以等收工，佢哋家陣喺英超榜排尾3，落後緊排第17位、踢多場嘅新特蘭4分，仲要得失球差輸成11球，即係話今場和波都幾乎肯定降班，成為英球壇史上首支奪得足總盃後「被叮」嘅球隊！所以今場可以話係背水一戰，難怪隊長卡達維都走出嚟呼籲隊友，要將足總盃嗰份鬥心帶埋落餘下兩場生死戰，希望上演一場「大逃亡」啦！

近4場僅1敗入波多
查實韋根嘅近況又唔係太差，近4場只輸過1場，其中3場都至少攻入2球o架！除咗新星卡林麥馬拿文同埋前鋒干尼夠晒搶鏡外，領隊馬天尼斯可以用蔗渣價錢踢出燒鵝味道擊敗曼城，亦都證明呢位曾獲利物浦垂青嘅教頭功力有番咁上下，想重演上季同一賽程贏波嘅戰果，唔係冇可能！

阿仙奴死火場場入1粒
至於要力爭歐聯席位嘅阿仙奴近8場聯賽都保持不敗，不過火力就不及以往咁勁，雖然禾確特連續2戰有波入，但兵工廠近4戰每場頂多都係入得1粒咁大把，今晚無法拉開紀錄嘅話隨時畀擅打反擊嘅韋根偷雞搶分。

韋根聯賽3連大
‧阿仙奴連續9場不敗。

‧禾確特連續2場開波3分鐘內閃電入波。

‧韋根連續4場有波入。

‧韋根連續3場聯賽開大。

信往績熱捧入球大過關
阿仙奴要爭歐聯入場券，韋根就要保住一絲護級希望，所以兩隊今場肯定全面搏火。而且韋根已經連續3場聯賽攻入對方2球以上，所以唔使擔心佢哋冇入波本錢。況且兩軍近5次交手有4次至少出現3個入球，雖然入球大只有1.4倍，但用嚟過關都唔錯呀！