突擊最把炮賓菲加煞車

歐霸盃決賽今晚喺荷蘭阿姆斯特丹上演！賓菲加同車路士兩支由歐聯「空降」嘅球隊，殺得入決賽當然實至名歸。雖然外界一致睇好車路士捧盃，不過賓菲加一向擅於企「下把位」，貪容易發揮佢哋最拿手嘅快速反擊嘛！何況雙方球員都互相熟晒路，預計呢場會係五五波大戰！賓菲加受讓幾大都捧1.57倍「讓球主勝」。

藍戰士14日5戰爆
賓菲加啱啱先喺葡超大戰波圖，唔少人擔心佢哋會踢殘晒，但正如賓菲加隊長雷沙奧講：「今季係賓菲加創造歷史嘅一季，個個都勁期待。」小弟認為佢哋依家已經處於亢奮狀態，點會咁易攰。況且講到疲態，點都唔及14日內踢第5場波嘅車路士啦！「藍戰士」咪同樣要為歐聯資格搏命，情況比賓菲加更嚴重。

泰利有傷唔踢得
再講，賓菲加同車路士班球員入面，有好幾個兩間球會都踢過，賓菲加中場尼曼查馬迪係車路士舊將，佢今季頂替離隊嘅查維加西亞表現突出，賽前佢仲揚言要車路士後悔放走佢添！而車路士嘅大衞雷斯同拉美利斯亦係前賓菲加球員，大家知己知彼，要打敗對方有一定難度。

車路士依家最煞食嗰招，就係中場桑馬達同夏薩特嘅組織同後上射門，不過賓菲加從來唔擔心畀對方控球在腳，事關佢哋嘅奧斯卡卡度素、奧斯華度加坦同洛迪高利馬等都係反擊高手，後防又有雷沙奧同加雷等穩陣球員壓陣。況且車仔泰利雖然有隨軍，但有傷肯定缺陣，賓菲加喺90分鐘內有力立於不敗之地。

頂占筍盤：賓菲加

賓菲加今屆歐霸盃僅1敗
賓菲加今屆歐霸盃只曾1敗。

賓菲加連續5場歐霸盃有失球。

車路士連續8場不敗。

決賽穩陣波做「細」界
兩軍距離冠軍只差一步，大家肯定唔想犯錯，踢法難免變得小心翼翼。賓菲加上場聯賽作客輸畀波圖後，銳氣已洩；至於車路士領隊賓尼迪斯擅長打穩守突擊，為咗爭冠軍一向都唔介意踢得醜陋。既然兩軍保守至上避免率先失球，1.72倍入球細值得支持。