川迪爭打歐霸斬草除「根」
2013/05/16文:查理阿蛋 
 

今晚荷甲嘅歐霸盃附加賽有格羅寧根主場迎戰傳統勁旅川迪，客軍去到季尾突然上力勇奪附加賽資格之餘，佢哋作客嘅表現更比主場優勝，有兩員大將復出之下有力重演聯賽次循環作客擊敗格軍嘅漂亮勝仗，客W有1.9倍，梗係值得捧啦！

格羅寧根遇勁旅即現形
格羅寧根喺荷甲最後7輪賽事經歷4連勝後，最後3仗對住阿積士同燕豪芬等勁旅就即刻「現形」，只係得1和2負兼且勁失7球，今仗作客嘅川迪就唔同喇，佢哋經歷一段8場不勝嘅頹勢後突然大反彈，最後8輪賽事居然獲得5勝3和嘅佳績，造就佢哋成功打番起嘅，正係一場作客大數格羅寧根3粒嘅勝仗！仲有呀，川迪客場表現相當穩定，近8戰只得1負，絕對值得投以信心一票。

雖然川迪今季無緣爭標，但查實陣中有唔少極具質素嘅球員，當中尤其以近4仗入3球嘅卡斯泰亞奴斯最可以為格羅寧根帶嚟威脅，查迪尼亦都頻頻有進帳，勢頹嘅主隊真係未必頂得住咁強嘅火力。客軍賽前仲傳嚟好消息添，就係正選門將米凱洛夫同埋左閘舒希達都已經復操，好有機會喺今場披甲，防線即刻穩陣番好多！就算隊長巴馬繼續缺陣，拎作客入球兼開「W」都唔係難事啦！

荷附賽制
採主客兩回合制，荷甲歐霸附為準決賽首回合，荷蘭聯賽附今輪為第2圈首回合。以上賽事兩回合計打和，將計算作客入球優惠，未分勝負將於次回合法定時間後加時30分鐘，加時階段仍計算作客入球優惠，再和則以互射12碼決勝。