祖記邊緣人有「森」有力 

意甲今個禮拜煞科，成功衞冕嘅祖雲達斯今晚造訪森多利亞，雖然呢場波對雙方嚟講都係例行公事，不過「斑馬兵團」啱啱有主帥干地繼續留効嘅消息沖喜，今場仲會考察班邊緣人嘅表現添，一班手足為前途照計唔會揸流攤，1.72倍客W可以放心捧。

據意大利《天空體育》報道，祖記教頭干地喺當地時間禮拜三去咗球會總部，3個鐘之後就四萬咁口出番嚟，當住大批傳媒面前同球會會長安迪亞阿尼利握手，《米蘭體育報》估干地已經決定同會方續約，消息亦指除咗基奧雲高、馬治斯奧、維達爾同今晚要停賽嘅保羅普巴係非賣品外，其餘球員都有機會被賣走，你話班邊緣人今仗有機會落場嘅話，又點會唔搏老命取悅干地吖？

同樣無欲無求嘅主隊森多利亞，有中場雷蘭費南迪斯坐波監，守將迪施維斯查、莊拿芬羅仙尼同悍將基斯迪錫倦勤，中後場穿晒大窿，呢班波近10戰未贏過之餘，中場主力奧比安同安德列普利又盛傳今夏會過檔「斑馬兵團」，點睇都唔似偷到雞。