西維爾皇蘇合演西甲「大」戰

西甲壓軸重頭戲，由西維爾喺主場迎戰急於搶分嘅皇家蘇斯達。西維爾家陣排喺第8位，爭下屆歐洲賽資格好渺茫，今戰大可以踢進攻足球，同仍然為來屆歐聯資格努力嘅皇蘇鬥攻開「大」騷，當係慰勞吓入場睇波嘅球迷，咁嘅環境，當然要捧1.59倍入球大啦！

西甲進入最後直路，西維爾被「作客病」累死，竟然淪為冇嘢好爭嘅球隊。點都好，雖然西維爾可以踢風流波，不過佢哋每逢喺主場出擊都例必踢得好好睇睇，鋒線眾將永遠交足功課，近5次地頭出戰，西維爾就入咗13球，咁又係呀，受到歐洲各大球會注視嘅前鋒尼格度固然係入球保證，就連雷恩斯、拿傑迪錫同捷西斯拿華斯等好波之人，成日都有士哥，今晚隨時又搞到皇蘇防線亂晒坑！

皇蘇防線跌晒watt
講到皇蘇，呢支中游分子今季搖身一變成為前4勁旅，的確令好多人跌晒眼鏡。早前佢哋喺主場擊敗華倫西亞，令雙方分數一度拉開到5分，「張峰」以為大局已定啦，點知皇蘇條防線突然跌晒Watt，近2仗失咗四球，分別喺領先嘅情況下被追和同畀人反勝，5分優勢化為烏有。今晚再唔拎足3分，隨時畀華倫過頭，形勢上皇蘇點都要喪攻，睇埋兩軍近期都係入得又失得，唔捧「入球大」真係對唔住自己！